డిప్యూటీ సీఎం భట్టి విక్రమార్క ఆదేశాలతో సాగర్ జలాల విడుదల

సాగర్ జలాలు రావడంతో సాగునీటితో పాటు చెరువులు, కుంటల్లోకి నీరు చేరే అవకాశం ఏర్పడటంతో రైతులు ఆనందం వ్యక్తం చేస్తున్నారు. పంటలకు సాగునీరు అందడంతో వాటిని కాపాడుకునే అవకాశం ఏర్పడిందని రైతులు తెలిపారు. పంటలు ఎండిపోతున్న సమయంలో సాగర్ నీరు విడుదల చేయడం పంటలకు ప్రాణం పోసినట్టుగా ఉందని పేర్కొన్నారు.

ఎల్‌నినో ప్రభావంతో వర్షాభావ పరిస్థితులు ఏర్పడే అవకాశాలను ముందుగానే గుర్తించి ప్రజా ప్రభుత్వం సాగు, తాగునీటి అవసరాలను దృష్టిలో ఉంచుకుని సాగర్ జలాలను విడుదల చేయడం అభినందనీయమని రైతులు అన్నారు. అందుబాటులోకి వచ్చిన నీటిని రైతులు సద్వినియోగం చేసుకుని పంటలను కాపాడుకోవాలని వారు కోరారు.

సాగర్ జలాలను విడుదల చేయించిన డిప్యూటీ సీఎం మల్లు భట్టి విక్రమార్కకు బోనకల్ మండల రైతాంగం ప్రత్యేక కృతజ్ఞతలు, అభినందనలు తెలిపింది.

ఈ కార్యక్రమంలో బోనకల్ మండల అధ్యక్షులు కర్నాటి రామకోటేశ్వరరావు, పైడిపల్లి కిషోర్, పిల్లలమరి నాగేశ్వరరావు, బద్రు నాయక్, యార్రంశెట్టి సుబ్బారావు, కందుల పాపారావు, గూడా నరసయ్య శాస్త్రి తదితరులు పాల్గొన్నారు.